Бөтәһе лә боҙға

Нефтекамала шыуғалаҡтар әҙерләй башланылар. 16 боҙ майҙансығы ҡаланың төрлө мөйөштәрендә эшләй башлаясаҡ, шуларҙың 11-е асыҡ һауала буласаҡ. Шыуғалаҡтарҙың төп өлөшө йөрөргә теләгән һәр кемде бушлай ҡабул итәсәк. Башҡа осраҡтарҙа түләү символик буласаҡ.

— Түләүле шыуғалаҡтар Мираҫ эргәһендә — ҡала мәҙәниәт паркында һәм Балалар һәм үҫмерҙәр ижадын үҫтереү үҙәге янында. Бында ҙур булмаған сумма, 20-30 һум аласаҡтар. Был — боҙҙо тәртиптә тотор өсөн, — ти Назар Шәйәхмәтов, Нефтекама ҡала хакимиәтенең физик культура, спорт һәм туризм комитеты рәйесе.

Түләүле майҙансыҡтарҙа тимераяҡтарҙы прокатҡа биреү ойоштороласаҡ. Боҙҙа кешеләр һанын сикләү планлаштырылмай, ә бына спорт инвентаре биреү пункттарында бөтә эпидемиологик нормаларҙы үтәп хеҙмәт күрһәтәсәктәр. Шыуғалаҡтарҙы декабрь айы башында асасаҡтар.