Беларусь Республикаһы Президенты Александр Лукашенко менән осрашыу

7 февралдә Минскиҙа Башҡортостан Башлығы Радий Хәбиров менән Беларусь Республикаһы Президенты Александр Лукашенконың осрашыуы булды. Яҡтар сауҙа-иҡтисади һәм гуманитар хеҙмәттәшлекте артабан үҫтереү һәм нығытыу перспективаларын тикшерҙе.

Александр Лукашенко билдәләүенсә, Белоруссия менән Башҡортостан араһында яҡшы мөнәсәбәттәр булдырылған, бер нисә берлектәге технологик проект ғәмәлдә.

– Әммә, асыҡ әйткәндә, былтыр әйләнеште бер аҙ кәметтек (бәлки, статистика мәғлүмәтте бик теүәл бирмәйҙер). Тауар әйләнеше 5-6 процентҡа түбәнәйҙе, – тине Александр Лукашенко. – Быйыл тауар әйләнешен арттырырға һәм быға тиклемге 315-320 миллион доллар күрһәткесен уҙып китергә бурыслыбыҙ.

Белоруссия Президенты билдәләүенсә, берлектәге проекттарҙы тормошҡа ашырыу сиктәрендә Башҡортостан менән эшләү уңайлы. Улар иҫәбендә – берлектә тракторҙар, троллейбустар, трамвайҙар һәм башҡа техника етештереү.

Александр Лукашенко шулай уҡ тауар әйләнешен артабан үҫтереү потенциалын юғары баһаланы, был осраҡта аҙыҡ-түлек тауарҙары һәм еңел сәнәғәт изделиелары сегменты күҙ уңында тотола.

– Башҡортостан – беҙҙең өсөн Рәсәйҙең бик мөһим төбәге, уның менән хеҙмәттәшлек итергә теләйбеҙ. Беренсенән, ул бик үҫешкән, алдынғы. Икенсенән, был Рәсәйҙең Европа биләмәһендәге үҙәге һәм, әгәр һеҙҙә эшләйбеҙ икән, күрше төбәктәрҙә лә эшләйәсәкбеҙ, тип иҫәпләргә мөмкин. Әгәр ниндәйҙер мәсьәләләр буйынса килешһәк, беҙҙең үҙ йөкләмәләребеҙҙе мотлаҡ үтәребеҙҙә шикләнмәгеҙ, – тине Александр Лукашенко.

Башҡортостан Башлығы Радий Хәбиров делегацияны йылы ҡабул итеүҙәре өсөн Белоруссия Президентына рәхмәт белдерҙе, шулай уҡ дәүләт етәксеһен 2025 йылдың ғинуарында үткән һайлауҙарҙа еңеүе менән ҡотланы.

– Был бик мөһим ваҡиға, тип иҫәпләйбеҙ – Белоруссия өсөн генә түгел, ә дөйөм алғанда ике дәүләтебеҙ өсөн дә, – тине Радий Хәбиров.

Төбәк етәксеһе киң йүнәлештәр буйынса ике яҡлы мөнәсәбәттәрҙе үҫтереүҙең әһәмиәте юғары булыуын һыҙыҡ өҫтөнә алды.

– Беҙҙең өсөн Беларусь – тышҡы иҡтисади партнёр ғына түгел. Был беҙҙең өсөн туғандаш республика. Был хаҡта һәр саҡ әйтеп киләбеҙ, – тип билдәләне Радий Хәбиров. – Беҙ һеҙҙең менән 2021 йылдың ҡышында осрашҡайныҡ. Ошо ваҡыт арауығында тығыҙ хеҙмәттәшлек иттек, Белоруссияның идара итеү командаһы менән таныштыҡ. Беҙ бер-беребеҙҙе тулыһынса аңлап эш итәбеҙ, – тине Радий Хәбиров. – Башҡортостан Белоруссиянан импортты йыл һайын арттыра, был эште дауам итәсәкбеҙ.

Республика Башлығы, республикала белорус тауарҙарына, шул иҫәптән транспорт һәм коммуналь техникаға, аҙыҡ-түлек тауарҙарына һәм еңел сәнәғәт изделиеларына ихтыяж ҙур, тип өҫтәне.

– 2022 йылда беҙ Беларусь Республикаһы Премьер-министры Роман Александрович Головченко менән Өфөлә Минск автомобиль заводының дилерлыҡ үҙәген астыҡ. Ә хәҙер компания вәкилдәре ҙур сервис үҙәге төҙөү менән ҡыҙыҡһына. «АМКОДОР» буйынса ла хәл шулай уҡ – төрлө техника етештереү буйынса холдинг заводы төҙөлөшө тамамланыу стадияһында, – тип билдәләне Радий Хәбиров. – Аҙыҡ-түлек секторы тураһында һүҙ йөрөткәндә, белорус тауарҙарын халҡыбыҙ яратып ҡуллана. Башҡортостанда улар 80-гә яҡын предприятиела һатыла. Шуға күрә берлектәге эште дауам итәбеҙ, яңы үҫеш нөктәләрен булдырасаҡбыҙ.

Осрашыуҙа шулай уҡ берлектәге инвестиция кластерын булдырыу, пилотһыҙ осоу аппараттары етештереүҙе үҫтереү һәм туризм өлкәһендәге хеҙмәттәшлекте киңәйтеү мәсьәләләре тикшерелде.

Белоруссия Президенты Александр Лукашенко менән осрашыу йомғаҡтары буйынса Башҡортостан Башлығы Радий Хәбиров журналистарҙың һорауҙарына яуап бирҙе. Төбәк етәксеһе фекер алышыуҙың төп темалары һәм өлгәшелгән килешеүҙәр тураһында һөйләне.

– Бик һөҙөмтәле осрашыу булды. Быға тиклем беҙ өс йыл элек Белоруссия Президенты менән осрашҡайныҡ һәм шул саҡта уҡ берлектәге эштең төп йүнәлештәрен билдәләнек. Бөгөн шул темаларға туҡталдыҡ да инде, – тип хәбәр итте Радий Хәбиров. – Әлбиттә, беҙ тауар әйләнешен үҫтереү менән ҡыҙыҡһынабыҙ. Александр Григорьевич былтыр беҙҙең экспорт иҫәбенә тауар әйләнешенең бер аҙ кәмеүенә иғтибар итте. Шул уҡ ваҡытта импорт, киреһенсә, йыл һайын арта, был бик яҡшы тенденция. Шуға күрә беҙ коммуналь, машиналар эшләү, ауыл хужалығы производствоһы өсөн техника менән тәьмин итеү буйынса тәҡдимдәрҙе тикшерҙек. Белоруссия Президенты шулай уҡ республикабыҙҙа сервис үҙәктәре селтәрен үҫтерергә тәҡдим итте, сөнки беҙҙә белорус техникаһы күп, һәм уны хеҙмәтләндерергә кәрәк.

Башҡортостан Башлығы шулай уҡ берлектәге эштең бер нисә төп йүнәлешен билдәләне.

– Әлбиттә, иғтибар үҙәгендә – тәрән сәнәғәт кооперацияһы. Беҙ уртаҡ продукция булдырабыҙ, мәҫәлән, белорус-башҡорт трамвайы. Белоруссияның «АМКОДОР» холдингы менән бер нисә проект алып барабыҙ. Уларҙың һәр береһе буйынса киләсәккә көнүҙәк мәсьәләләрҙе тикшерҙек, – тине Радий Хәбиров. – Президентҡа башҡорт-белорус инвестиция кластерын булдырыу идеяһын тәҡдим иттек. Был яңы иҡтисади күренеш. Дөйөм алғанда, был мәсьәләлә беҙ Белоруссия Президенты тарафынан хуплау таптыҡ.

Берлектәге эштең мөһим йүнәлештәре иҫәбендә төбәк етәксеһе гуманитар һәм туристик хеҙмәттәшлекте киңәйтеүҙе билдәләне.

– Беҙҙең өсөн Беларусь – ул тышҡы иҡтисади партнёр ғына түгел. Беҙҙе туғанлыҡ мөнәсәбәттәренең оҙайлы тарихы бәйләй. Осрашыуҙа социаль, мәҙәни, гуманитар мәсьәләләрҙең киң даирәһен тикшерҙек, – тип белдерҙе Радий Хәбиров. – Беҙ республикабыҙ халҡы өсөн Белоруссияның туристик мөмкинлектәрен асырға теләйбеҙ. Бер нисә йыл инде беҙҙә «Башҡорт-белорус оҙон ғүмерлелеге» программаһы эшләй, уға ярашлы ветерандарыбыҙ льготалы хаҡҡа ялға килә. Әлбиттә, белорустар ҙа беҙгә барһа, беҙ шат булыр инек. Бынан тыш, Александр Григорьевич Башҡортостанда зубрҙар көтөүен формалаштырыу буйынса ғилми проектыбыҙҙы тормошҡа ашырыу менән ҡыҙыҡһынды. Президент ярҙамы менән беҙ республикаға 18 зубр ҡайтарғайныҡ, ә хәҙер улар 23-кә етте, йәғни улар беҙҙең төбәктә биш башҡа артты ла инде. Дөйөм алғанда, был беҙҙең дуҫлыҡ һәм хеҙмәттәшлектең мөһим проекты.