Ҡиммәтле металдарға инвестициялаған...

Балаҡатай районында йәшәүсе 55 йәшлек ир мутлашыусыларға 2 миллион һумдан ашыу аҡса күсергән.

Ул полиция хеҙмәткәрҙәренә былтыр көҙ таныш булмаған кешенең шылтыратыуын, үҙен бизнес-аналитик тип таныштырыуын һөйләй. Шылтыратыусы ҡиммәтле металдар биржаһына инвестициялар буйынса куратор булараҡ хеҙмәтен тәҡдим иткән. Ир тәҡдим менән ҡыҙыҡһына башлай, интернет-инвестицияларҙан яҡшы аҡса эшләй алам, тип дәртләнә.

Ғәмәлдәр схемаһы түбәндәгесә булған: тәүҙә ир “махсус” кешеләрҙең иҫәбенә аҡса күсергән (2 мең һумлыҡ ваҡ суммаларҙан башлаған). Был кешеләр, йәнәһе, биржала уның янсығын тулыландырып, акциялар һатып алған. Тәүҙә барыһы ла яҡшы бара: куратор даими рәүештә шылтыратып, янсығының үҫеш графигын күрһәтә, ә ир иҫәпкә аҡса тултырыуын дауам итә. Әммә тиҙҙән үҙ аҡсаһы бөтә, сөнки ул 500 мең һумға яҡын аҡса һала өлгөрә.

Аферистар иҫәпте ашығыс рәүештә тулыландырыуҙы талап итә, ышаныслы кеше булмаһа, табышты ала алмаясағын аңлатып, иргә кредит алырға ҡуша. Ир ярҙам һорап ҡатынына мөрәжәғәт иткәс, хәләле 200 мең һумдан ашыу кредит алып бирә. Әммә, куратор, аҡса сығарыу «техник проблема» арҡаһында уңышһыҙлыҡҡа осраны, ти.

Бер аҙҙан мутлашыусылар ир менән тағы ла бәйләнешкә инә, табышты алырға тәҡдим итә. Ир аҡса күсергәс, операцияны тамамлау өсөн интернет-валюта һатып алырға кәрәклеген белдерәләр. Ир дуҫтарынан бурысҡа аҡса алып, енәйәтселәрҙең иҫәбенә күсергән. Аферистар шунан һуң аралашыуҙан туҡтаған.

Һөҙөмтәлә ир 2 миллион һумдан ашыу аҡсаһын юғалтҡан.

Хөрмәтле республика халҡы, финанс донъяһында һеҙгә ифрат һаҡ булырға һәм аҡсағыҙҙы кемгәлер ышанып тапшырыр алдынан һәр ваҡыт мәғлүмәтте тикшерергә кәрәк. Алдаҡ ҡорбаны булмаһын өсөн яҡындарығыҙға, дуҫтарығыҙға, таныштарығыҙға ошондай мутлыҡ схемалары тураһында хәбәр итеү мөһим. Иҫегеҙҙә тотоғоҙ: ышаныслы кешеләр менән шикле тәҡдимдәрҙе тиҙ арала фекер алышыу етди финанс юғалтыуҙарҙан ҡотҡара ала.

Башҡортостан Республикаһы буйынса Эске эштәр министрлығының матбуғат хеҙмәте.

Фото: https://vk.com/mvdporespublikebashkortostan?from=search