Яҙғы ташҡынға әҙерлек тикшерелә

Башҡортостан Башлығы Радий Хәбиров уҙғарған аҙналыҡ оператив кәңәшмәлә гидротехник ҡоролмаларҙың яҙғы ташҡынға әҙерлеге тикшерелде.

Тәбиғәттән файҙаланыу һәм экология министры Нияз Фазылов хәбәр итеүенсә, Башҡортостанда 524 гидротехник ҡоролма эшләй. Уларҙың барыһы ла ғәҙәттән тыш хәл килеп тыуғанда яҙғы ташҡынға әҙер.

– Айырыуса ҙур объекттарға иғтибар бүләбеҙ. Тәбиғәттән файҙаланыу һәм экология министрлығының оператив идаралығында республика милкендәге 27 объект бар. Улар 16 район һәм бер ҡала округы биләмәһендә урынлашҡан. Бынан тыш, 11-енән 21 мартҡа тиклем  гидротехник станцияларҙа аварияға ҡаршы күнекмәләр үтәсәк. Уларҙа һыу баҫыу зонаһына эләккән муниципалитет вәкилдәре лә ҡатнашасаҡ, – тине ведомство етәксеһе.

Нияз Фазылов Башҡортостанда йылғаларҙы таҙартыу, ярҙы нығытыу, гидротехник станцияларҙы капиталь ремонтлау буйынса саралар үткәрелеүен дә һыҙыҡ өҫтөнә алды.

Радий Хәбиров профилле ведомстволарға һәм муниципалитет башлыҡтарына яҙғы ташҡын мәсьәләһен айырым күҙәтеүҙә тоторға ҡушты.

– Һеҙҙең ҡарамағығыҙҙа бөтә техника бар. Әгәр барыһын да ваҡытында эшләһәгеҙ, ауылдарға зыянды кәметергә мөмкин буласаҡ, – тине ул сығышында.