Ураҙа ғәйете мөбәрәк булһын!

Башҡортостан Республикаһы мосолмандарының Диниә назараты рәйесе, мөфтөй Айнур хәҙрәт Бирғәлин: —Әссәләмү ғәләйкүм үә рахмәтуллаһи үә бәрәкәтүһ, хөрмәтле дин ҡәрҙәштәр!

Һеҙҙе Ураҙа ғәйете — ураҙа тотоу, таҙарыныу, рухи яңырыу байрамы менән ихлас күңелдән ҡотлайым. Изге Рамаҙан айы - ураҙа тотоу, доға ҡылыу, мәрхәмәтлек һәм уйланыу мәле артта ҡалды. Беҙ Аллаһы Тәғәләгә яҡыныраҡ булырға, иманыбыҙҙы нығытырға, йөрәгебеҙҙе таҙартырға һәм тирә-яҡтағыларға тик изгелектәр эшләргә тырыштыҡ. Аллаһы Тәғәлә беҙҙең ураҙаларыбыҙҙы, доғаларыбыҙҙы, зәкәттәребеҙҙе, изге эштәребеҙҙе ҡабул итһен🤲. Был яҡты көн өйҙәрегеҙҙе шатлыҡ-ҡыуаныс, күңелдәрегеҙҙе тыныслыҡ, йөрәгегеҙҙе рәхмәт нуры менән тултырһын. Ғаиләләрегеҙҙә мөхәббәт, үҙ-ара аңлашыу хөкөм һөрһөн. Аллаһы Тәғәләнән халҡыбыҙға һәм бөтә өммәтебеҙгә һаулыҡ, тотороҡлолоҡ, тыныслыҡ һәм илебеҙҙең сәскә атыуын һорайбыҙ. Ураҙа байрамы менән! Байрам мөбәрәк булһын!