Беҙ онотмайбыҙ! Беҙ ғорурланабыҙ!

Йыл һайын йола буйынса Ватанды яҡлаусылар көнө алдынан ҡала мәҙәниәт бүлеге патриотик йыр конкурсын үткәрә. Быйыл да был конкурс яңы йырҙарға, асыштарға бай булды.

Балалар баҡсалары быйыл конкурста онлайн ҡатнашты. I дәрәжә дипломды “Мин еңеүсе булып ҡайтам” йырын башҡарған 5-се балалар баҡсаһы тәрбиәләнеүселәре һәм “Буденовсы” йырын башҡарған 4-се балалар баҡсаһының “Ҡояшҡай” студияһы яуланы.

Ҡалған йырсылар Ағиҙел спорт-ял итеү үҙәге сәхнәһендә сығыш яһаны. Жюри командаһы I дәрәжә дипломды алты башҡарыусыға тапшырҙы. Бына улар: “Ноктюрн” ансамбленең урта һәм кесе төркөмө, ошо ансамблдең етәксеһе Эльмира Әхмәҙиева менән шөғөлләнгән Радмила Сайфутдиарова һәм Арина Ғәлиева, “Зоренька” ансамбленең ҡатын-ҡыҙҙар төркөмө һәм “Савитар” балаларға өҫтәмә белем биреү үҙәге педагогы Илнур Шәүәлиев.

Лауреаттарҙың сығыштарын Ағиҙел тамашасыһы 23 февралгә бағышланған концертта ҡарай алды.

Фотола: “Зоренька” ансамбленең ҡатын-ҡыҙҙар төркөмө.