Нефтекаманың бөтә мәктәптәрендә лә Башҡорт кухняһы көнө үтте

Нефтекаманың бөтә мәктәптәрендә традицион Милли кухня көнө үтте. Был көндө мәктәп ашханалары танымаҫлыҡ булып үҙгәрҙе.

Төшкө аш залдары милли стилдә биҙәлгәйне, өҫтәлдәрҙә башҡорт кухняһының иң яҡшы традицияларында төрлө ризыҡтар ҡуйылды. Ә мәктәп ашнаҡсылары был көндө үҙ ҡарамағындағыларҙы башҡорт аштарынан торған яңы меню менән ҡыуандырҙы. Был көндө өҫтәлгә хуш еҫле ҡуллама һәм туҡлыҡлы самса бирелде.

Башҡорт гимназияһында ла өҫтәлдәр һый-хөрмәттән һығылып торҙо. Бәлеш, тәбикмәк, ҡыҫтыбый, өсбосмаҡ, сәк-сәк, ваҡ бәлеш, бауырһаҡ — һәр класс үҙҙәре әҙерләгән башҡорт кухняһы ризыҡтарын тәҡдим итте. Бында һәр ризыҡтың эҙмә-эҙлекле өйрәтелгән рецебын да алырға була ине. Йәш һәм саҡырылған артистар башҡарыуында башҡорт йырҙары, бейеүҙәр байрам атмосфераһы булдырҙы. Ысын башҡорт кухняһы байрамы булды!