Интернет һәр районда, һәр ауылда буласаҡ

Башҡортостанда былтыр «Һаулыҡ һаҡлау» милли проекты сиктәрендә интернет селтәренә 389 фельдшер-акушерлыҡ пункты тоташтырылған, ағымдағы йылда тағы ла 351 ФАП тоташтырыласаҡ. Был хаҡта республиканың Һаулыҡ һаҡлау министрлығында белдерәләр.

Барлыҡ медицина ойошмалары пациенттар менән видеоконференция үткәреү мөмкинлегенә эйә буласаҡ. Бынан тыш һаулығына хәүеф янаған пациенттарға күсмә телемедицина мониторингы ҡоролмалары беркетеләсәк, уларҙың хәле контролдә тотоласаҡ.

Әлеге ваҡытта төбәктә медицина документтарының берҙәм базаһы булдырылған, унда биш миллионға яҡын электрон медицина картаһы бар. Системала ярты миллиардтан ашыу медицина ярҙамы күрһәтеү осрағы теркәлгән, лаборатор тикшереүҙәргә 25 миллион электрон йүнәлтмә бирелгән, 100 миллиондан ашыу медицина һүрәттәре архивлаштырылған. Шулай уҡ, бөгөн системала 10,5 миллион электрон рецепт һәм 5,5 миллион ваҡытлыса эшкә яраҡһыҙлыҡ ҡағыҙы тултырылған.

Мәғлүмәтте һаҡлауға «Һаулыҡ һаҡлау» милли проекты булышлыҡ итә. Республиканың һаулыҡ һаҡлау тармағына «Һанлы контур» проекты әүҙем индерелә, ул медицина ойошмалары һәм Һаулыҡ һаҡлау министрлығы араһындағы юридик яҡтан мөһим документтарҙың әйләнешен тәьмин итәсәк. Шулай уҡ «Дәүләт хеҙмәттәре» порталының «Минең сәләмәтлек» бүлегендә лә ҡулланыусыларҙың һанын ете тапҡыр арттырырға планлаштыралар.

Республика «Электрон больничный» проектын тормошҡа ашырыуҙа ла әүҙем ҡатнаша, әлеге ваҡытта Рәсәй субъекттары араһында ошондай документ төрөн биреү буйынса алтынсы урында тора.

Шулай уҡ Бреспубликала «Һанлы иҡтисад» милли проекты сиктәрендә социаль йәһәттән мөһим объекттарҙы Интернет селтәренә тоташтырыуҙың икенсе этабы башланды. Ағымдағы йылда ошо эш 800-гә яҡын социаль объектта тормошҡа ашырылырға тейеш.

Сығанаҡ: «Башҡортостан» гәзите.