Йәш умартасылар — КВН-сылар ҙа

Нефтекама филармонияһы сәхнәһендә мәктәп уҡыусылары һәм студенттар менән бер рәттән иң көслө команда исеме өсөн КВН тарихында тәүге тапҡыр йәш умартасылар ҙа көрәште. “Төньяҡ” умартасылар союзы” төбәк йәмәғәт ойошмаһының “Йәш умартасылар” түңәрәгендә шөғөлләнеүсе балалар был өлкәлә лә үҙҙәрен һынап ҡарарға булды.

Команда составында Богдан Хужин, Егор Федоров, Андрей Бондаренко, Алексей Тимитов, Геннадий Тимершин һәм команда капитаны Булат Әхиәров булды. Тәүге тапҡыр ҡатнашһа ла, команда мауыҡтырғыс һәм дәртле итеп сығыш яһап, киләһе этапҡа үтте.

Уйын ваҡытында түңәрәктең старостаһы Булат Әхиәровҡа БР йәштәре араһында умартасылыҡты популярлаштырыуға ҙур өлөш индергәне өсөн БР Ауыл хужалығы министрлығының Рәхмәт хаты тапшырылды. Шулай уҡ бөтә балаларға ла умартасылыҡ берлегендә әүҙем ҡатнашҡандары өсөн Краснокама районы хакимиәте һәм “Төньяҡ” умартасылар союзы”ның Рәхмәт хаттары бирелде. Егеттәр аҡсалата премия менән дә бүләкләнде.