Сүп-сар сығарған өсөн хаҡты комиссияһыҙ ҡайҙа түләргә була?

«ЭСКБ» яуаплылығы сикләнгән йәмғиәте һәм ҡаты көнкүреш ҡалдыҡтарын сығарыу буйынса төбәк операторы «Дюртюлимелиоводстрой» араһындағы килешеү ноябрь башында тарҡалды.

1 ноябрҙән почта аша түләүҙәр ҡабул ителмәй башланы, Интернет аша сайт буйынса ла түләп булмай. Бөгөн Һаҡлыҡ банкы аша түләргә мөмкин. Әммә ул комиссия ала: бында шундай тәртип 1 ноябрҙән индерелгән. Комиссияның күләме лә бер төрлө генә түгел, түләүҙең суммаһына бәйле.

Бөгөн сүп-сар сығарған өсөн хаҡты комиссияһыҙ «Почта-банк» ҡабул итә. Уның да шарты бар: түләүсенең «Почта-банк» пластик картаһы булырға тейеш. Уны булдырыу ауыр түгел. Паспорт менән әлеге банктың теләһә ҡайһы бүлексәһенә барһаң, уны бушлай рәсмиләштереп бирәләр.

Шулай уҡ Интернет аша, ЭСКБ сайты аша түгел, ә Һаҡлыҡ банкыңдағы шәхси кабинетығыҙ аша түләргә мөмкин. Унда комиссия 1 процент тәшкил итә.

Элек ҡаты көнкүреш ҡалдыҡтарын сығарған өсөн килгән түләү ҡағыҙҙарында торлаҡ йортҡа теркәлгән кешеләр һаны тура килмәгән осраҡта, түләүҙе ҡабаттан иҫәпләтеү өсөн ғариза яҙып ЭСКБ-ға мөрәжәғәт итә ине халыҡ. Хәҙер, килешеү тарҡатылғанлыҡтан, был мөмкин түгел. Ғариза, теркәү урыны бите менән паспорт күсермәһе, ғаилә составы йәки ваҡытлыса теркәү урыны тураһындағы белешмәне электрон почта аша [email protected] ебәрергә була.