Ир-егеттәр сыҡты алышҡа

Краснокама районы үҙәгендәге “Кама буйы” физкультура-һауыҡтырыу комплексында өлкән йәштәге ир-егеттәр араһында үткән спорт фестивалендә шахмат-шашкала, баскетбол кәрзиненә туп ырғытыуҙа һәм дартста көс һынаштылар.

Фестивалдә барлыҡ 14 ауыл биләмәһенән дә ике кешенән торған команда ҡатнашты.

Баскетбол кәрзиненә туп ырғытыуҙа Никольск ауыл биләмәһенән Александр Алынбәковҡа етеүсе булманы. Ҡарый ауыл биләмәһенән Сәүбән Йыһаншин 2 урын яуланы. 3 урын Яңы Ҡабандан Камил Сәйетовҡа бирелде.

Сәүбән Йыһаншин үҙен оҫта шашка уйнаусы булараҡ та күрһәтте һәм 1 урын яуланы. Был төр бәйгелә 2 һәм 3 урындарға Николо-Березовканан Валерий Латыпов һәм Ҡуяндан Камил Дәүләтшин лайыҡ булды.

Дартста 1 һәм 3 урындарҙы Сауыҙбаш ауыл биләмәһенән Рамай Ғәбсәләмов менән Рауил Кәримов алды. Мүзәктән Владимир Шапаев — 2 урында.

Шахмат бәйгеһендә призлы урындарҙы Яңы Ҡабандан Флер Шәйхәйҙәров, Сауыҙбаштан Рауил Кәримов һәм Арландан Анатолий Титов яуланы.