

Йыл һайын үткәрелгән был хәрәкәттә төбәктә йәшәүсе 210 мең кеше - мәктәп уҡыусылары, студенттар, волонтерҙар һәм хеҙмәт коллективтары ҡатнашҡан.
«Уларҙың тырышлығы менән быйыл көҙгөһөн бар республикала 76 меңдән ашыу төп ағас-ҡыуаҡ (18 меңгә яҡыны - эре ағастар) ултырттыҡ. Беҙ баштан уҡ эре ағастарҙы һайланыҡ, улар тиҙерәк үҫеп китә», — тигән бының тураһында социаль селтәрҙәрҙә Радий Хәбиров.
Республика етәксеһе белдереүенсә, район-ҡалаларҙа 85 тематик аллея барлыҡҡа килгән. Уларҙың күбеһе төрлө ваҡыт геройҙарына арналған.
«Был быуындар тарихы өсөн яҡшы күренеш, киләсәккә беҙҙең яҡташтарҙың батырлығын күрһәтеү өсөн яҡшы ысул, — тигән төбәк етәксеһе. — Хәҙер ултыртылғанды тәрбиәләргә, һаҡларға кәрәк. Беҙ шулайтып Башҡортостанды матурыраҡ һәм уңайлыраҡ итәбеҙ. Барыһына ла рәхмәт!»
Сығанаҡ: «Башинформ» мәғлүмәт агентлығы.