Ике көн эсендә «Евразия йөрәге» фестиваленә 20 меңгә яҡын тамашасы килгән

Өфөлә Рәсәй һәм Беларусь төбәктәренең Х форумы барышында ойошторолған «Евразия йөрәге» халыҡ-ара сәнғәт фестиваленә 20 меңгә яҡын тамашасы килгән.

Шишәмбе Өфөлә «Славян баҙары» һәм «Евразия йөрәге» фестивалдәре осрашты. Сараның икенсе көнөндә милли кейемдәрҙә донъялағы иң күмәк әйлән-бәйлән рекорды ҡуйылды.

- Статистикаға ярашлы, тәүге кистә ҡатнашыусылар (артистар) 250-нән күберәк, ә тамашасылар 5 меңгә яҡын ине. Икенсе көндө ҡатнашыусылар (артистар) 900-ләгән булһа, тамашасылар 15 меңдән ашып китте, - тине фестивалдең матбуғат секретары Ирина Захарова.

Хәтерегеҙгә төшөрәбеҙ, 28 июндә «Евразия йөрәге» халыҡ-ара фестивале өфөләрҙе һәм баш ҡала ҡунаҡтарын Симфония төнөнә һәм «Рәсәй-Мәҙәниәт» телеканалының «Ҙур опера» проектының гала-концертына саҡыра. Тура трансляцияларҙы Башҡортостан юлдаш телеканалында һәм фестивалдең социаль селтәрҙәрендә ҡарарға мөмкин.