Краснокама районы уҡыусылары Ғ.Туҡайҙың шиғырҙарын уҡыны

Краснокама районы Николо-Берёзовка ауылы мәктәбе базаһында «Туҡай моңнары» республика уҡыусылар конкурсының муниципаль этабы үтте.

Конкурстың тематикаһы татар халыҡ шағиры, күренекле йәмәғәт эшмәкәре, әҙәби тәнҡитсе Һәм публицист Ғабдулла Туҡай ижады менән бәйле. Ғабдулла Туҡайҙың ижади мираҫы быуындан-быуынға балаларҙа тыуған йортона, тыуған еренә һөйөү һәм һаҡсыл мөнәсәбәт тәрбиәләй, ныҡышмалы хеҙмәтте, сабырлыҡты баһаларға өйрәтә, донъяны эстетик ҡабул итеүгә нигеҙ һала.

Конкурста район мәктәптәре уҡыусылары ҡатнашты. Сәхнәнән шағирҙың әҫәрҙәре татар телендә генә түгел, башҡорт, рус, мари һәм инглиз телдәрендә лә яңғыраны. Жюри режиссерлыҡ постановкаһын да, башҡарыу оҫталығын да, әҙәби материалдың әһәмиәтен дә баһалай. Конкурс йомғаҡтары буйынса төрлө номинацияларҙа еңеүселәр һәм призерҙар билдәләнде. Улар республика конкурсында район намыҫын яҡларға тейеш.

Иң яҡшы башҡарыусылар райондың мәғариф бүлеге грамоталары һәм дипломдары менән бүләкләнде.