Нефтекама дауаханаһының балалар хирургия бүлегендә ремонт эштәре тамамланды

Ундағы ремонт эштәрен Башҡортостан Республикаһы һаулыҡ һаҡлау министрының беренсе урынбаҫары Роберт Иштуков, Башҡортостан Республикаһы Дәүләт Йыйылышы-Ҡоролтай рәйесенең беренсе урынбаҫары Рөстәм Әхмәҙинуров, дауахананың баш табибы Рафаэль Зиятдинов, Башҡортостан Төбәк хеҙмәттәшлегенә һәм үҫешенә булышлыҡ итеү фонды етәксеһенең йәмәғәтселек менән бәйләнеш буйынса урынбаҫары Антонина Миненко ҡабул итте.

Нефтекама ҡалаһы ҡала округы депутаттары ярҙамында «ЛАКИ» хәйриә фонды көсө менән ҙур күләмдә ремонт эштәре – балалар хирургия бүлеген комплекслы яңыртыу тормошҡа ашырылды. Өс ай эсендә дауахананың 600 м2 майҙанлы хирургия бүлеге тулыһынса үҙгәртелде, унда йыл һайын 800-ҙән ашыу балаға дауалау үткәрелә.

—Айырыуса уйын бүлмәһе һәм дауахана стеналарының нисек үҙгәргәнен күреү ҡыуаныслы. Беҙ махсус рәүештә бүлектең художестволы биҙәлешенә иғтибар иттек һәм рәссамдарҙы саҡырҙыҡ. Улар бүлекте фонд символы - изге лаки айыу балаһы тураһында йәнһүрәт сюжеттары менән биҙәне. Беҙ барыбыҙ ҙа балаларҙың дауаханаларҙа ла бала булып ҡалыуын беләбеҙ. Дауаланыу ваҡытында уларға дуҫтарса мөхиттә булыу мөһим, унда хатта стеналар ҙа йылылыҡ һәм хәстәрлек тойғоһо бирә, – тип һыҙыҡ өҫтөнә алды «ЛАКИ» хәйриә фонды президенты Татьяна Есаулкова.