Краснокама районында әҫәйҙәр турында иҫтәлектәргә ҡоролған кисә үтте

Ҡуҙғау авылы сәхнәһенә биш ҡатын-ҡыҙ үҙҙәренең әсәйҙәре -  үҙҙәренең намыҫлы хеҙмәте һәм изгелеге менән ауылдаштары хөрмәтен яулаған ауыл ҡатындар тураһында һөйләргә сыҡты.

Розалия Хафизова оҙаҡ йылдар фельдшер булып эшләй: ҡыҙы Рүзилә һөйләүенсә, уның бала саҡтағы табип уйыны ғүмерлек һөнәргә әйләнә. Медицина училищеһын тамамлағас, Розалия Әнәс ҡыҙы тыуған ауылына ҡайта һәм 35 йыл дауамында тәүлектең теләһә ниндәй ваҡытында, теләһә ниндәй көндә ауылдаштарына медицина ярҙамы күрһәтергә ашыға. Ҡуҙғауҙар өсөн ул фельдшер ҡына түгел, ысын табип була. Ә өйҙә ул - хәстәрлекле әсәй һәм тырыш хужабикә булып ҡалған.

Әнфисә Ялалова урындағы магазинды 37 йыл буйы һатыусы булып эшләй. Уның ҡыҙы Рита әсәһенең ауыр тоҡтарҙы үҙе тейәп-бушатыуын, эш ваҡытынан тыш ауылдаштар ғәҙәттән тыш кәрәк саҡта магазинды асып биреүҙән бер ҡасан да баш тартмауын иҫкә алды. Шул уҡ ваҡытта Әнфисә Суфиан ҡыҙы ҙур хужалыҡ алып бара, өс бала үҫтерә. Айырым түҙемлек һәм зирәклек күрһәтеп, ғүмере буйы ҡәйенәсәһе менән йәшәгән.

Әлфирә Нуриәхмәтова — үҙе лә залда ултырған бәхетле әсәй. Уның ҡыҙы Гөлназ һөйләүенсә, бала саҡта Әлфирә йырсы булырға хыялланған, әммә яҙмыш уны тегеү фабрикаһына, артабан «Арланнефть»кә операторлыҡҡа алып килгән.  Промыселда теләһә ниндәй һауа торошонда көн дә 30ар километр йәйәү качалкаларын урай ул. Намыҫлы хеҙмәте өсөн уға «Башҡортостан Республикаһының атҡаҙанған нефтсеһе» тигән маҡтаулы исем бирелгән.

Дания Хафизова — ауылдың беренсе тракторсыһының күп балалы ғаиләһендә үҫкән һауынсы. Уның ҡыҙы Нәзилә әсәһенең таң атҡансы һыйыр һауып, өйҙәге мал-тыуар менән идара итеп, алты баланың сәсен үреп өлгөрөүе һәм шул уҡ ваҡытта фермаға беренсе булып барып етеүе тураһында һөйләне. Дания Ғавас ҡыҙы хаҡлы ялға сыҡҡас та тағы ете йыл эшләүен дауам иткән.

Фәридә Фәүзинова ғүмере буйы колхозда төрлө эштәрҙә эшләй. Уның ҡыҙы Зөлфиә Ғарипова әсәһен тыныс, аҡыллы ҡатын, бик тәмле аш бешереүсе, балаларын ҡәтғи тәрбиәләүсе һәм «юҡ» тигән һүҙҙе танымаған кеше булараҡ иҫкә алды. Фәридә Минигали ҡыҙы өс йыл буйы ауырыу ҡәйенәсәһенә ҡараған, ҡайғыртыу өлгөһөн күрһәткән. «Мин уны ҡосаҡлап: „Әсәкәй, һин изге ҡатынһың, һин нәнәйемҙе ҡарап, беҙгә лә өлгө күрһәтәһең бит“, — тинем. Шулай килеп сыҡты ла: мин дә тәүҙә ҡәйенәсәйемә ҡараным, уны һуңғы юлға оҙаттым, ә артабан үҙебеҙҙең әсәйгә ҡараным», — тип уртаҡлашты ҡыҙы.

Сығыш яһаусыларҙың һәр ҡайһыһы айырым билдәләне: әсәйҙәр бала саҡтан уҡ уларҙы хеҙмәткә өйрәткән, изгелеккә, ныҡлыҡҡа өндәгән. 

Сәхнә биҙәлешенә айырыуса иғтибар йәлеп ителгәйне: ул ауыл өйө итеп стилләштерелгән — туҡма паластар, боронғо һандыҡ, самовар, ут ҡылымы менән янып торған мейес һәм тал быталарынан үрелгән бишек — бындай бишектә ауыл балаларының нисә быуыны үҫте.

Зөлфиә Ғәлина, Луиза Тухватуллина һәм кис алып барыусы Рәмзилә Ниғмәтуллина башҡарған әсәй тураһындағы йөрәккә ятҡан йырҙар тамашасыларҙы илатып ебәрҙе. Расим Тухватуллин, Хадит Тухбатов һәм Баязит Сәләховтың гармунсыларҙың күңелле көйҙәре байрам кәйефе өҫтәне. Кисәне клуб мөдире Холя Ильясова ойошторҙо.