Николо-Берёзовка ауылында «Икенсе ғаилә» исемле шәхси пансионат эш башланы

Николо-Берёзовка ауылында «Икенсе ғаилә» исемле шәхси пансионат эш башланы. Был пансионат даими ҡарауға мохтаж ятып торған сирлеләр һәм өлкән йәштәге кешеләр өсөн асылған. Уны Нефтекама эшҡыуары Хатип Ғәлиев нигеҙләгән. «Ҡурай» гәзите хәбәрсеһе яңы пансионатҡа барып, унда йәшәүселәр өсөн шарттар нисек икәнен күреп ҡайтты.

Бында хәҙер ни бар?

Нефтселәр урамындағы бина район халҡына яҡшы таныш - элек бында «Башнефть» командировкаға килеүсе эшселәре өсөн ҡунаҡхана урынлашҡайны. Хәҙер ул танымаҫлыҡ үҙгәргән.

Эске биҙәлеш хәҙерге заман талаптарына ярашлы, сифатлы материалдарҙан эшләнгән. Бында һәр бәләкәй генә әйбер ҙә уйланылған: заманса люстралар, сәғәттәр, пәрҙәләр. Иҙәндә - заманса япма, көҙөк түшәмдәр, стеналар тигеҙләнеп, асыҡ төҫтәргә буялған. Мебель күңелгә хуш, шкафтар күп урынлы, тумбочкалар тәгәрмәсле, өҫкө яғы әйләнмәле - был ятып торғандарҙы ашатыу өсөн уңайлы.

Урын-ергә айырым иғтибар бүленгән. Функциональ карауаттар бейеклеге буйынса көйләнә, ятып торғандарҙа тән тишелеп боҙолуын киҫәтеүсе матрастар ҡуйылған. Урын-ергә сифатлы туҡыманан, матур бизәкле ап-аҡ простынялар йәйелгән.

Бер бүлмәлә бер кешенән алып биш кешегә тиклем йәшәй ала. Һәр бүлмәлә ҙур телевизор, кондиционер бар. Йәшәү хаҡы күрше һанына ҡарап тәүлегенә 1800 һумдан башлана.

Дөйөм зал — ул шул уҡ ваҡытта ашхана булып тора, унда матур өҫтәлдәр, ултырғыстар ҡуйылған. Стеллаждарҙа өҫтәл уйындары, өҫтәлдә гәзиттәр, шул иҫәптән район гәзите ята. 

Бәләкәй генә ашхана бүлмәһендә ашнаҡсы эшләй, ул тәмле өй ризыҡтары әҙерләй. Пациенттарҙы көнөнә алты тапҡыр ашаталар. Меню төрлө, хатта ҡыҙыл балыҡтан аштар ҙа бар. Барыһы ла парҙа бешерелә: үтле, тоҙло, ҡурылған ризыҡтар юҡ. Емеш-еләк биреү мотлаҡ.

Пансионаттың өҫтөнлөктәренең береһе — аҙнаһына бер тапҡыр һыу индереү көнө ойошторолоу. Ятып торған кешене йыуыу өйҙә туғандар өсөн ҙур проблемаға әүерелә. Бында был эш өсөн махсус көслө ир-егеттәр яллана.

Бөтә бәдрәфтәр «Йайлы мөхит» принцибы буйынса йыһазландырылған. Йөрөүе ҡыйын булғандар өсөн күсереп йөрөтөлә торған унитаз бар. Урынынан тора алмаған пациенттарға памперстар, пеленкалар һалына.

Пансионатта кер йыуыу эше лә ойошторолған. Был эште айырым хеҙмәткәр башҡара: йыуғас, кер мотлаҡ үтекләнә. Беренсенән, үтекләнгән кергә ятыу рәхәт, икенсенән, эҫе үтек бактерияларҙы үлтерә. Бер нисә йыуыу машинаһы, киптереү камераһы бар.

Ғөмүмән, пансионат отельде хәтерләтә: инеү урынында ресепшн ҡоралған. Унда монитор ҡуйылған, бөтә бүлмәләрҙәге видеокамераларҙан һүрәт шул мониторға килә, пациенттар дежурныйҙың күҙәтеүе аҫтында тора. Дежурный шулай уҡ дарыуҙарҙы ваҡытында биреү өсөн яуап бирә. Дарыуҙарҙы пациенттар үҙҙәре менән алып килә йәки урындағы терапевт яҙа — табип аҙнаһына ике тапҡыр килә, һәр пациентты ентекле тикшерә, кәрәк булһа, туғандар менән килештереп дауалауҙы төҙәтә.

Пансионат матур урында — урман ситендә урынлашҡан. 11 сутый майҙанды биләгән территория кәртәләп алынған; йәйгеһен уны төҙөкләндереү күҙаллана, шул саҡта пациенттар үҙҙәре йәки сиделкалар оҙатыуында арбала йөрөп, саф ҡарағай һауаһы менән һулыш ала аласаҡ.

Был пансионат кемдәр өсөн?

«Икенсе ғаилә» — туғандары эштә булғанда йәки берәр ҡая киткәндә, үҙ аллы йөрөй, үҙ-үҙенә ҡарай алмаған кешеләр өсөн ваҡытлыса торлаҡ булып тора.

Пансионатта ете кеше эшләй. Уларҙы «Раздолье» психоневрология интернатында 20 йыл эшләгән Снежанна Петрова етәкләй. Сиделкалар ун пациентҡа бер. Башҡа хеҙмәткәрҙәр ҙә социаль өлкәлә тәжрибәле; осраҡлы кешеләр юҡ.

Хәбәрсе пансионатта төшкө аш ваҡытында булды һәм хеҙмәткәрҙәрҙең үҙ пациенттарына ни тиклем хәстәрлек менән ҡарауҙарына шаһит булды. Бөгөнгө көндә бында йәшәүсе 12 пациенттан тик ике-өсәүһе генә ишетә, һөйләшә һәм булғанды аңлай. Был хәлдә хеҙмәткәрҙәрҙең сабырлығына һәм изге күңеллелегенә сокланмай булдыра алмайһың: улар сит кешеләргә нәҙек кенә ҡарай, бер нәмәнән дә тартынмай, үҙҙәрен бик тәртипле, лайыҡлы тота.

Пансионат нисек барлыҡҡа килде

«Икенсе ғаилә» өсөн урын һайлау осраҡлы булмаған. Учреждениены нигеҙләүсе Хатип Ғәлиев һөйләүенсә, бина һәм ер участкаһы социаль йорт өсөн иң ҡулайы булырға тейеш булған. «Икенсе шарт — пансионат ҡала эсендә түгел, ә урман эргәһендәге тыныс урында урынлашырға тейеш. Бында тыныс, уңайлы, шау-шыу юҡ. Шуға күрә Николо-Берёзовканы һайланыҡ», — тип аңлатты эшҡыуар.

Пансионат булдырыу идеяһы ғәмәли тәжрибәнән тыуған. Хатип Ғәлиевтың төп бизнесы ритуаль хеҙмәттәр менән бәйле, шулай уҡ ул ятып торған ауырыуҙарҙы ташыу менән шөғөлләнә — был тирә-яҡта берҙән-бер йыһазландырылған машина. «Ауырыуҙы дауаханан өйөнә сығаралар, ә алып барып ҡуйырға урын юҡ тигән хәлдәр менән йыш осрашырға тура килде: туғандары эшләй, ауырыуҙы кем ҡараясағын белмәй. Был осраҡта ике генә юл; йә эшләү һәм яҡыныңды ҡарауһыҙ ҡалдырыу йә эштән китеү һәм аҡсаһыҙ ултырыу. Шул саҡ ошо идея килде», — тип иҫкә ала Хатип Әмирйән улы.

Башта ул был эшкте төптән өйрәнә: алты ай Краснодарҙа шәхси пансионаттар селтәрендә стажировка үтә. «Ошо тәжрибәгә нигеҙләнеп, үҙемдең шәхси пансионатымды астым — әйтә алам, бындай учреждение тирә-яҡта башҡа юҡ», — ти ул.

Бинаны нисек тәртипкә килтерәләр

Пансионат өсөн һайланған бина 2014 йылдан бирле буш торған. Ҙур ремонт талап ителгән. «Кәртәнән башлап, барыһын да үҙгәртергә тура килде. 1000 квадрат метр ҡыйыҡты, барлыҡ ағыуҙарҙы алмаштырҙыҡ, ҡыйыҡты эстән уратып ремонтланыҡ. 150 тәҙрәне, бөтә эске ишектәрҙе алмаштырҙыҡ; санузелдарҙы  ремонтланыҡ. 800 квадрат метр майҙанда иҙәндәрҙе тулыһынса һүтеп яңынан эшләнек - тик залдағы керамик плитка ғына ҡалды. Йылытыу системаһы, электр уттары, янғын сигнализацияһы һәм видеокүҙәтеүҙе бөтөнләй яңынан эшләнек; һыу үткәргес һәм канализацияны тулыһынса үҙгәрттек. Ваҡ-төйәк эштәр әллә ни күпме — һанап та бөтөрөрлөк түгел. “Быныһы шулай ярай, ҡалһын” тигән булманы», — тип айырым билдәләй Хатип Ғәлиев.

Төҙөлөш 2025 йылдың авгусында башланған, ә 2026 йылдың 20 февралендә пансионатҡа тәүге пациент килеп ингән. Төҙөлөш эштәре ҡыҙған саҡта бында бер юлы 100 кеше эшләгән: ҡыйыҡсылар, слесарҙар, электриктар... «Барыһы ла эштәрен намыҫ менән эшләргә тырышты, идея барыһына ла оҡшаны», — тип йылмайып һөйләй ул.

Проектҡа һалынған аҡса, нигеҙләүсе һүҙҙәренсә, ҙур булған. Уйын тормошҡа ашырыр өсөн хужаға фатирын һәм машинаһын һатырға тура килгән; хәҙер ғаиләһе менән торлаҡ ҡуртымға алып тора, йәйәү йөрөй. «Был проектты тиҙрәк тормошҡа ашырғым килде — кешеләрҙең тормошон еңеләйтеүгә  бер аҙ булһа ла ярҙам итергә теләнем», — ти  Хатип Әмирйән улы.

«Икенсе ғаилә» пансионаты — был бары тик бизнес-проект ғына түгел. Күп кенә ғаиләләр өсөн урында ятҡан яҡындарын ҡарау һәм эшләү араһында өҙгәләнергә мәжбүр саҡта барлыҡҡа килгән киҫкен социаль проблеманы хәл итеү өмөтө. Район өсөн, бында бындай учреждениелар әлегә булмаған саҡта, уның асылыуы — мөһим ваҡиға.