“Махсус хәрби операция яугирҙары өсөн милли ризыҡ" флешмобы үтте

Уҡыусылар ашнаҡсылар һәм уҡытыусылар менән бергә республикабыҙҙа йәшәгән халыҡтарҙың милли аш-һыуын әҙерләне. Мәктәптәрҙә уҡыусылар  туҡмас һәм печенье әҙерләне, ә Башҡорт гимназияһында һалма эшләнеләр.

Һалма эшләү буйынса оҫталыҡ дәресе Башҡорт гимназияһының ашханаһында үтте. Уны директорҙың административ-хужалыҡ эше буйынса урынбаҫары Зөбәржәт Кутлимбетова һәм педагог Гөлшат Исхаҡова үткәрҙе. Оҫталыҡ дәресендә 8-се «шайморатов» класы һәм 10-сы класс уҡыусылары ҡатнашты. Күп кенә ҡыҙҙар ҡамыр йәйә һәм туҡмас киҫә белә, әммә улар һалма менән тәүгә осрашты. 

- Был сара беҙгә бик оҡшаны. Уҡытыусыларыбыҙҙың ҡамырҙы оҫта йәйеп, киҫкәнен күҙәтеү бик ҡыҙыҡ булды. Беҙ, хеҙмәтебеҙгә бөтә күңел йылыһын һәм изге хис-тойғоларҙы һалып, гуманитар акцияла ҙур ҡәнәғәтлек менән ҡатнаштыҡ. Беҙҙең яугирҙарға бындай посылка ҙур ҡыуаныс килтерер, тип уйлайым, - тине 10 класс уҡыусыһы Әҙилә Әлмөхәмәтова.

- Көсөбөҙ бушҡа түгел - бөгөн беҙ әҙерләгән бөтә нәмә гуманитар конвой составында махсус хәрби операцияла ҡатнашыусыларға ебәреләсәк. Берлектәге эш беҙҙе берләштерә, үҙебеҙҙе яҡындарыбыҙға ярҙам итергә әҙер булған берҙәм команда итеп тоябыҙ, - тип өҫтәне Лия Ғәниева, «шайморатов» класы уҡыусыһы.

Милли ризыҡтан тыш, Башҡорт гимназияһы уҡыусылары МХО зонаһына түшәк кәрәк-яраҡтары ебәрә. Һәр класс берәр комплект һатып алды.