“Был шундай бәхет, хатта һүҙҙәр менән аңлатып булмай”

Ейәнсәрҙәрегеҙҙән донъялағы иң изгелекле кем ул,  тип һорағыҙ. «Был бит һеҙ!», -  тигән  яуап ишетерегеҙ. Ә кем донъялағы иң яҡшы тирбәлеүҙәр эшләй, иң тәмле коймаҡтар һәм пирогтар әҙерләй? Был бөтәһе лә һеҙ, олатай-өләсәйҙәр!

Ейәндәренең һәр изге һүҙе Иршат Һәм Рәйфә Шәрәфиевтарҙың күңеленә хуш килә.

Уларҙың тормошо ныҡлы ғаиләнең яҡшы өлгөһө булып тора. Бер-береһен бала саҡтан беләләр. 1985 йылда өйләнешәләр. Уларҙың бөтә тормошо - бер бөтөн хеҙмәт. Шәрәфиевтарҙың дөйөм стажы туҡһан йылға яҡын! Иршат Рәзим улы ҡырҡ ике йыл нефтсе булып эшләй, Рәйфә Рәйеф ҡыҙы  ҡырҡ дүрт йыл һаулыҡ һаҡлау өлкәһенә бирә, шуларҙың һуңғы 27 йылын психоневрология интернатында шәфҡәт туташы булып эшләй. Күп наградалары һәм почет грамоталары бар.

Ике ул үҫтерәләр. Рим ғаиләһе менән Яңауылда йәшәй. Ул ҡатыны Лиана менән ата-әсәһенә ике ейәнсәр бүләк итә. Илдар иһә әле ғаилә ҡормаған.

Ун бер йәшлек Риана ишек төбөнән өләсәһенән уға нимә менән ярҙам итә алыуын һорай. Туғандары баһалауынса, бергә әҙерләгән билмән һәм манты бигерәк тәмле була! Ә һигеҙ йәшлек Ридаль, олатаһы кеүек,  футбол ярата. Әйткәндәй, барыһы ла спорт менән дуҫ. “Риана менән Ридаль бер нәмә менән дә сағыштырғыһыҙ донъя бүләк итә, - тиҙәр ир менән ҡатын.  - Был шундай бәхет, хатта һүҙҙәр менән аңлатып булмай”.