Бабайҙа ҡышты оҙаттылар

Бабай ауылы халҡы сираттағы тапҡыр ҡунаҡтар ҡабул итте — халыҡ байрамында бирелә йәшәүселәр генә түгел, ситтән килеүселәр ҙә ҡатнашты.

Ҡалтасы районының Бабай ауылы “Айыҡ ауыл” республика конкурсында ҡатнашыу айҡанлы, мари халыҡ байрамы “Уярня”ны ойошторҙо.

Был конкурс ауыл биләмәләре араһында бишенсе тапҡыр үткәрелә. 2021-2022 йылдарҙа районды республика этабында Оло Туғанай ауылы тәҡдим итһә, 2023 йылда бабайҙар сыҡты.

Конкурстың төп маҡсаты — айыҡ  һәм сәләмәт йәшәү рәүеше алып барыуға иғтибарҙы үҫтереү, халыҡты йәмәғәт эшенә, изге һәм файҙалы эштәргә  йәлеп итеү. Бабай ауылы халҡы бик әүҙем. Бирелә бөтә ауыл халҡы ҡатнашлығында айыҡ тормош алып барыуға йүнәлтелгән саралар көн дә тиерлек үтә.

Илебеҙҙә йәшәгән халыҡтар араһында ҡышты оҙатыу йолаһы киң таралған. Был боронғо мәжүси байрам кешеләрҙең ер эшкәртеү, уңыш йыйыу, мал аҙығы әҙерләүгә тулыһында бәйле булған ваҡыттарын хәтерләтә — былар барыһы ла яҙ етеү, йылы ҡояш менән генә мөмкин.

Ике йыл элек бабайҙарҙың күршеләре – Вәсил ауылы халҡы тәүге тапҡыр "Уярня" йолаһын үткәрә. Унда өс йөҙҙән ашыу кеше ҡатнаша. Был идеяны удмурт ауылдары — Оло Туғанай һәм Оло Ҡасаҡ ауылдары ла күтәреп ала, тик унда был байрам “Вой келян” тип атала. Былтыр ҡыш был байрамды Түбәнге Ҡасмаш ауылы халҡы ла үткәрә. Байрам шул тиклем иҫтә ҡала һәм күңелгә хуш килә, унда ҡатнашыусылар ике тапҡырға күберәк була.

Ә бабайҙар мең ярым кеше йыя! Ауыл халҡынан башҡа, сарала район ҡунаҡтары, шулай уҡ башҡа райондар вәкилдәре: фольклор коллективтар, спорт уйындарын яратыусылар ҡатнаша.

Сарала мәртәбәле ҡунаҡ — БР Дәүләт Йыйылышы — Ҡоролтай депутаты Тамара Танһыҡҡужина, “Эрвел Марий” төбәк мари милли-мәҙәни автономияһы рәйесе Радион Плотников , Ҡалтасы районы хакимиәте башлығы урынбаҫарҙары Алексей Горев һәм Фәйрүзә Ғафарова ҡатнаша.

2019 йылдан алып "Айыҡ ауыл" конкурсында бөтәһе 3 меңдән ашыу ауыл, 30 меңгә яҡын активист һәм меңдән ашыу ирекмән ҡатнашҡан. 39 ауыл биләмәһе “Айыҡ ауыл” исемен йөрөтә.

2023 йылда конкурстың муниципаль этабына 1 070 тораҡ пункт ғариза бирә. Республика ойоштороу комитеты ултырышында конкурсанттар дүрт номинация буйынса: эре, ҙур, уртаса ҙурлыҡтағы һәм бәләкәй тораҡ пункттар номинацияларына бүленә. 25 апрелдә Өфөнөң “Торатау” Конгресс-холында йомғаҡ яһаласаҡ.

2024 йылдан “Айыҡ ауыл” конкурсының приз фонды арттырылды, яҡынса 50 миллион һум тәшкил итә. Уның һөҙөмтәһендә республиканың ауыл биләмәләрендә инфраструктураны төҙөкләндереү һәм үҫтереү буйынса тағы ла күберәк эштәр башҡарыласаҡ. Бынан алда жюри ағзалары 54 тораҡ пункт араһынан дүрт номинация буйынса 12 еңеүсене һайланы. Еңеүселәр 1,5-6 миллион һумлыҡ аҡсалата приздарға дәғүә итә алды. Хәҙер конкурста ҡатнашыусыларҙың барыһына ла аҡсалата бүләктәр тапшырыласаҡ — һәр тораҡ пунктҡа 200 мең һум күләмендә түләүҙәр буласаҡ.