Йөҙҙән ашыу ағиҙелдәр - ир-егеттәр, ҡатын-ҡыҙҙар, балалар - иртәнге сәғәт 9-ҙа «Нур» мәсетенә йыйылды. Намаҙ уҡыу залы, ғәҙәттәгесә, иртә таңдан уҡ мәсеттә үҙ урынын ала башлаған диндарҙар менән тулды. Урында хоҡуҡ һаҡлау органдары хеҙмәткәрҙәре дежур итте.
Айҙар хәҙрәт, имам-хатиб - Башҡортостан Республикаһы мосолмандары Диниә назаратының Үҙәкләштерелгән дини ойошмаһы Ағиҙел ҡалаһы ҡала округының урындағы «Нур» мосолмандар дини ойошмаһы рәйесе, байрам һәм уның мосолмандар тормошондағы әһәмиәте тураһында вәғәз менән мөрәжәғәт итте.
Унан һуң күмәкләп намаҙ уҡынылар. Байрам менән ҡала хакимиәте исеменән диндарҙарҙы хакимиәт башлығы урынбаҫары Рәмил Ғәниев ҡотланы. Айҙар хәҙрәт Рәсәй мосолмандарының Диниә назараты рәйесе Рауил Ғәйнетдиндың ҡотлау хатын уҡып ишеттерҙе.