Краснохолм 2-се мәктәбендә мәктәп инициативалы бюджетлау-2024 кампанияһы эшенә

Мәктәп инициативалы бюджетлау-2023 проектында уңышлы ҡатнашыу тәжрибәһе менән дәртләнеп, ул саҡта мәктәп медиаүҙәген булдырыу өсөн ҡорамалдар һәм мебель алынғайны, Краснохолм 2-се мәктәбе уҡытыусылары һәм өлкән класс уҡыусылары советы был проектта быйылғы уҡыу йылында ла ҡатнашырға тигән берҙәм фекергә килде.

Сираттағы педсоветта мәктәп директоры Марина Владимировна Никитина мәктәп коллективын “Башҡортостан Республикаһында инициативалы бюджетлауҙы үҫтереү” төбәк программаһы менән таныштырҙы. Мәктәп инициативалы бюджетлау проекты - дөйөм белем биреү мәктәптәре уҡыусыларының локаль әһәмиәттәге мәсьәләләрҙе хәл итеүҙә туранан-тура ҡатнашыу формаһы. Ул уҡыусыларҙың иң мөһим башланғыстарын тормошҡа ашырыуға бюджет аҡсаһын тотоноу йүнәлештәрен билдәләй.

Марина Владимировна директор урынбаҫары Э.М. Хәйруллинаны мәғлүмәт-коммуникация технологиялары буйынса куратор итеп тәғәйенләргә тәҡдим итә. Педагогик коллектив был идеяны бер тауыштан хупланы. Һүҙ Эльвира Мәүлит ҡыҙына бирелде, ул артабанғы эш планы менән таныштырҙы. Был мәғлүмәтте социаль селтәрҙәрҙә һәм мәктәптең рәсми сайтында урынлаштырыу өсөн инглиз теле уҡытыусыһы Я.М.Әйүпова билдәләнде. Шуны ла билдәләү мөһим, юғары класс уҡыусылары үҙ фекерҙәштәре командаларын булдырып, киләсәк проекттар идеяларын әҙерләүгә ҙур теләк менән тотоноп ҡына ҡалманы, ә үҙҙәре презентациялар төҙөп, уларҙы тиҫтерҙәре һәм уҡытыусылары алдында яҡланы. Тыңлаусылар иғтибарына юғары класс уҡыусыларының 5 проекты тәҡдим ителде. Улар: "Мәктәп музейы", "Мәктәптә һанлы  китапхана", "Биология лабораторияһы", "Лингафон кабинеты" һәм "IT-лаборатория" проекттары.

Бөтә проекттар ҙа мәктәп өсөн бик ҡыҙыҡлы һәм файҙалы булды, юғары класс уҡыусылары үҙ сығыштарын булдырыу өҫтөндә берҙәм эшләне.

Беренсе проект Виктория Исламова командаһының эше булды, ул “Мәктәптә һанлы китапхана” проектын төҙөп тәҡдим итте. Тиҫтерҙәре һанлы китапхананың өҫтөнлөктәре менән танышты һәм бындай китапхананың хәҙерге заман уҡыусыларын күберәк йәлеп итәсәге менән ризалашты.

Тыуған яҡтың мәҙәниәтен һәм традицияларын өйрәнеү проблемаһы менән Павел Климовских һәм 10-сы класс командаһы ҡыҙыҡһынып, "Мәктәп музейы" проектын әҙерләгән. Балалар һанлы технологиялар быуатында тиҫтерҙәренең тыуған ауылының һәм районының күренекле кешеләре тураһында аҙ белеүен билдәләне.

10-сы класс уҡыусылары мәктәптә музей булмау проблемаһына аудиторияның иғтибарын йәлеп итте, үҙ мөрәжәғәтендә улар тыңлаусылар белмәгән тарихи факттарҙы килтерҙе һәм быларҙың барыһын да мәктәп музейына барып белергә мөмкинлеген аңлатты. 9А класс уҡыусылары Полина һәм Глеб тауыш биреү өсөн аудиторияға үҙҙәренең проектын тәҡдим итте. Был - "Биология лабораторияһы" проекты. Уҡыусылар һорау алыу үткәрә һәм биология донъяһына тулыһынса инеү өсөн мәктәпкә Полина Голиш командаһы төҙөгән лаборатория етмәй тигән фекергә килә.

"Лингафон кабинеты" проектын үҙ аллы әҙерләгән Ислам Хәлиуллиндың сығышы ҡыҙыу һәм сағыу булды. Сығарылыш класс уҡыусыһы артабанғы уҡыуҙа һәм эштә уға һәм башҡа сығарылыш уҡыусыларына сит телдәрҙе ныҡлы белеү кәрәклеген билдәләне. Тап шуға күрә ул был проектты әҙерләүгә тотона, лингафон кабинетының бер нисә вариантын тәҡдим итте һәм был варианттарҙың бөтә ыңғай һәм кире яҡтарын ентекләп тикшерҙе. Тыңлаусылар уның проекты менән ҡыҙыҡһынды, ә сит телдәр уҡытыусылары Ислам сығышының ҡайһы бер идеяларын иғтибарға алды.

Мәктәп инициативалы бюджетлау проекттары идеялары еңеүсеһе-2023 Данил Сәйетов уҡыусылар һәм уҡытыусылар өсөн ҡыҙыҡлы һәм көнүҙәк идеяны - IT-лаборатория булдырыуҙы быйыл да тәҡдим итте. Бөтә ерҙә лә цифрлаштырыу фактын танып, Данил планшеттар һәм ноутбуктар өсөн мобиль станция һатып алырға тәҡдим итә. Ул станция уҡыусыларға беҙҙең һанлы донъяла оҫтараҡ булырға, кибер хәүефһеҙлек тураһында бөтә нәмәне лә белергә һәм IT-технологияларҙа уҡыусыларҙың белемен үҫтереүҙе дауам итергә ярҙам итәсәк. Сығарылыш класс уҡыусыһы Данил үткәргән тикшеренеүҙәр 9-сы һәм 11-сы кластарҙы тамамлаусыларҙың күбеһе IT һөнәренә өҫтөнлөк биреүен күрһәтә.
Данилдың проекты менән аудиторияның күпселек өлөшө ҡыҙыҡһынды. Февраль башында Краснохолм 2-се урта мәктәбенең акттар залында 2024 йылда мәктәп инициативалы бюджетлау проектында ҡатнашыуға тәҡдим ителәсәк проектты һайлау буйынса дөйөм тауыш биреү үтте. 11-се класс уҡыусыһы Данил Сәйетовтың "IT-лаборатория" проекты бер тауыштан ҡабул ителде һәм еңеүсе булды. Данилға һәм уның проектына уңыштар һәм дауамлы булыуын теләйбеҙ!