Ағиҙелдә ретро-фестиваль үтте

Байрам көнө иртәнге зарядканан башланды, унда «Әүҙем оҙон ғүмерлелек» клубы ағзалары ҡатнашты. Клуб тренеры Лилиә Ғосманова 80-се йылдар музыкаһына ғәҙәти булмаған зарядка үткәрҙе.

Архив эштәре буйынса хеҙмәте Төҙөүселәр көнөнә арналған «Тарих төҙөйҙәр» архив фотодокументтар күргәҙмәһен әҙерләне. Ҡала музейы «Почет таҡтаһы» фотозонаһын әҙерләне. Ә Үҙәк китапхана махсус әҙерләнгән «Совет фатиры» фотозонаһында фотоға төшөргә тәҡдим итте.

Ағиҙел малайҙары Георгий Ивановтың ретро-мопедтар күргәҙмәһен ҡыҙыҡһынып ҡараны. Күргәҙмәгә ҡуйылған мотоциклдар уҙған быуаттың 50-70-се йылдары аҙағында - 70-се йылдар башында элекке Советтар Союзының төрлө мөйөштәрендә етештерелгән.

Был көндә шашка, шахмат, домино һәм өҫтәл теннисы буйынса ярыштар үтте.

«Русское лото» лотереяһын уйнатыу кисәнең иң ҡыҙыҡлы мәле булды. Үҙенең актерлыҡ һәләтен ҡулланып, уны 2-се мәктәп уҡытыусыһы Илнур Иштуғанов үткәрҙе.

Кисә «Иҙел» мәҙәниәт йорто артистары әҙерләгән концерт һәм дискотека менән тамамланды.