Ағиҙелдә кикбоксинг буйынса республика турниры үтте

Сараның ҡунаҡтары махсус хәрби операцияла ҡатнашҡан  Башҡортостан Республикаһы Эшҡыуарлыҡ һәм туризм министрлығының әйҙәүсе советнигы Дамир Лоҡманов, Батырлыҡ һәм генерал Шайморатов ордендары кавалеры, «Геройҙар ваҡыты» президент программаһында ҡатнашыусы Оскар Ситдиҡов булды.

Спортсылар бер нисә сәғәт буйына «Ағиҙел» спорт-ял итеү үҙәгендә үҙҙәренең оҫталыҡтарын күрһәтте. Күрһәтмә ярыштар көндөң беренсе яртыһында башланды. Көрәш келәмендә йәш көрәшселәр сығыш яһаны. Ярыштар кис һуң ғына тамамланды. Турнирҙы  ҡарарға өс йөҙҙән ашыу кеше килде. Улар ярышта ҡатнашыусыларҙың оҫталығын баһалай алды һәм үҙҙәренең күп һорауҙарына яуап алды. Билдәләп үтергә кәрәк, сараның ҡунаҡтары бөтә йәш төркөмдәре вәкилдәре булды. Ләкин йәштәр был сараға ҙур иғтибар бүлде. Был аңлашыла ла, сөнки күпселек студенттар, уҡыусылар, Ағиҙел халҡы үҙҙәре лә спорттың башҡа төрҙәре менән әүҙем шөғөлләнә, көрәш менән мауыға.

Спорт байрамы бүләкләү тантанаһы менән тамамланды. Республиканың баш ҡалаһынан данлыҡлы алып барыусы Ильяс Батыргәрәев һәм «Арғымаҡ» башҡорт этно-рок төркөмө артистары көрәш аренаһында еңеүселәрҙе һәм призёрҙарҙы йылы сәләмләне һәм кисә буйына күңелен асты. Сарала йыйылған  бөтә аҡсалар махсус хәрби операция яугирҙарына ярҙамға йүнәлтеләсәк.