Башҡорт телендә һөйләйем һәм йырлайым

Ағиҙел ҡалаһы «Савитар» өҫтәмә белем биреү үҙәгендә мауыҡтырғыс сара - «Башҡорт телендә һөйләшәм һәм йырлайым» фольклор сәғәте уҙҙы. 2-се мәктәптең 3 класс уҡыусылары өсөн педагог-ойоштороусы Алһыу Ғәлләмова музей буйлап мауыҡтырғыс экскурсия үткәрҙе. Әңгәмә барышында ул башҡорт теле хаҡында һөйләне, милли кейемдәрҙе, альбомдарҙы һәм ошо темаға арналған китаптарҙы күрһәтте.

Кисәнең икенсе өлөшөндә балалар музыкаль программала ҡатнашты. Унда ҡунаҡ сифатында Шакировтар ғаиләһе сығыш яһаны. Гөлнур Ишмырҙа ҡыҙы башҡорт бейеүе элементтарын күрһәтте һәм балаларҙы   тыпырларға өйрәтте. Фәдис Мәүлит улы, үҙ сиратында, һыҙғыртҡыста уйнаны, балаларға ла шул тиклем оҡшаны, хатта улар унан ошо ҡоралда уйнарға өйрәтеүен һораны. «Ынйылар» ансамбле солисы Илнур Ноғоманов Фәнисә Семенушкина етәкселегендә башҡорт телендә бер нисә йыр башҡарҙы. Сара һуңында барлыҡ ҡатнашыусылар Фәнисә Мәснәүи ҡыҙы менән бергә башҡорт телендә яңы йыр өйрәнде.