Ағиҙелдә премьера булды

Сәхнәлә - Мәзит Шәмхановтың «Ҡәйнә» комедияһы. Мәңгелек тарих һымаҡ: ике ҡатын, бер өйҙә ике хужабикә, быуындар һәм амбициялар көрәше. Әммә был таныш, ихлас һәм көлкөлө булды!

Кис буйы сәхнәлә Лениза Фәтхетдинованың героиняһы – ҡәйнә – булды. Зал уны көслө алҡыштарға күмде. Уның эргәһендә - сағыу актерҙар ансамбле: Гөлшат Исхаҡова, Ильяс Ғимаев, Урал Шөғәйепов, Зөлфиә Ураҙаева, Нурия Мусина һәм Миләүшә Ғатауллина. Һәр береһе үҙ холҡо, үҙ дөрөҫлөгө менән.

Режиссер Рәсимә Сәләхова сәхнәлә актерҙарҙы ғына түгел, ә ысын хис-тойғоларҙы йыйған. Тамашасылар күҙ йәштәренә тиклем көлдө, әммә ниндәйҙер мәлдә уйланды: ә был шаярыу ғына түгел бит. Был беҙҙең хаҡта. «Мин һине аңлайым», - тип ваҡытында әйтеүҙең ни тиклем мөһим булыуы хаҡында, ҡай саҡ бер-беребеҙҙе ишетеү ауыр булыуы хаҡында.

Премьера уңышлы үтте - геройҙар үҙҙәре менән сәскәләрҙән тыш, тамашасыларҙың һөйөүен дә алып ҡайтып киттте.