Ағиҙел командаһы «Башҡортостанда оҙон ғүмерлелек» фестивалендә Гран-при яуланы

Ҡунаҡтарҙы һәм ҡатнашыусыларҙы Башҡортостандың ғаилә, хеҙмәт һәм халыҡты социаль яҡлау министры Ленара Иванова сәләмләне. Ул өлкән быуын кешеләренең әүҙемлеге республикаға көс биреүен айырым билдәләне.

Ағиҙел ҡалаһы данын «Әүҙем оҙон ғүмер» клубы командаһы яҡланы. Хөрмәтле ветерандарыбыҙ үҙ ҡалаларын лайыҡлы күрһәтеп кенә ҡалманы, ә дөйөм иҫәптә беренсе урын яулап һәм беренсе дәрәжә дипломға лайыҡ булып, ысын мәғәнәһендә ҙур уңышҡа өлгәште.

Еңеү - ҙур команда эше һөҙөмтәһе булды.

Муниципалитеттың күргәҙмә-презентацияһы Лиана Федотова етәкселегендә әҙерләнде. Ойоштороусылар Ғәлиәпану Шакироваға айырыуса рәхмәт белдерә. Уның милли аш-һыуы ысын сәнғәт әҫәренә һәм стендтың кулинария биҙәгенә әүерелде. Жюриҙы экспозиция менән  сағыу, күңел биреп һәм оҫта итеп Миләүшә Ғатауллина таныштырҙы.

Флария Сәләхова фестиваль ҡунаҡтары өсөн иҫән ҡалыу өсөн паракордтан беләҙектәр үреү буйынса оҫталыҡ дәресе үткәрҙе. Теләгән һәр кем файҙалы күнекмәне үҙләштереүҙән тыш, махсус хәрби операция яугирҙарына  ярҙамға ла үҙ өлөшөн индерә алды.

Клубтың Лениза Фәтхетдинова әҙерләгән видеоролик формаһындағы визит карточкаһы тамашасыларҙы тормош тәжрибәһе һәм һүнмәҫ энергия тураһындағы тарих менән хайран ҡалдырҙы.

Татьяна Порсева етәкселегендәге «Көмөш бейеүселәр» бейеү төркөмө дәртле итеп «Колечко» рус бейеүен башҡарҙы, залды дәртлелеге һәм артислыҡ һәләте менән хайран ҡалдырҙы.

Альбина Ғәйфуллина етәкләгән «Ағиҙелкәй» башҡорт фольклор ансамбле башҡарыуында  «Сонайым» йыры тамашасыға уғата  тәьҫирле яңғыраны.

Ағиҙел пенсионерҙары йәнә бер тапҡыр өлкән йәштең сикләү түгел, ә үҫеш өсөн яңы мөмкинлектәр һәм ресурс булыуын иҫбатланы. Уларҙың энергияһы, тыуған ҡаланы һөйөүе һәм бөтмәҫ-төкәнмәҫ таланты мөғжизәләр тыуҙыра.