Ағиҙелдә «Бәләкәй рыцарь һәм принцессалар балы» үтте

Байрам программаһы бай һәм мауыҡтырғыс булды. Йәш ханымдар һәм джентльмендар матур көйҙәр аҫтында ысын бал бейеүҙәрендә әйләнде. Ижади оҫталыҡ дәрестәрендә балалар үҙҙәренең тәүге шедеврҙарын булдырҙы. Һаулыҡ мөмкинлектәре сикләнгән балаларҙың эштәре күргәҙмәһе һәр ҡунаҡтың күңеленә хуш килде — йәш таланттарҙың фантазияһы һәм оҫталығы сикһеҙ икәнлегенә һәр кем инанды.

Байрамдың ысын йәүһәре — «Турғай» өлгөлө балалар музыкаль театры артистары башҡарыуындағы «Дюймовочка» спектакле булды. Балалар тамашаны тын да алмай ҡарап ултырҙы!

Ойоштороусылар өсөн иң ҙур бүләк — балаларҙың ихлас шатлығы, уларҙың көлкөһө һәм ҡыуанысы. Бындай мәлдәр беҙгә айырыуса мохтаждарға йылылыҡ һәм иғтибар бүләк итеүҙең мөһимлеген иҫкә төшөрә.

Байрамды һаулыҡ мөмкинлектәре сикләнгән балаларҙың ата-әсәләре  берләшмәһе — «Беҙ бергә» төбәк йәмәғәт ойошмаһы үткәрҙе. Балаларыбыҙ тормошонда шатлыҡ сәбәптәре мөмкин тиклем күберәк булһын!