Ағиҙелдә «Һылыуҡай-2026» матурлыҡ һәм талант конкурсы үтте

Байрамды Ағиҙелдә йәшәүсе талантлы  Альбина Ғәйфуллина үҙенең моңло сығыштары һәм йырҙары менән биҙәне. Уның ихлас, тәрән мәғәнәле композициялары юғары баһаға лайыҡ булды һәм йәш конкурсанттарҙы ысын мәғәнәһендә илһамландырҙы, уларҙы тамашасылар алдында ҡыйыу сығыш яһарға рухландырҙы.

Быйыл ойоштороусылар көтөлмәгән хәлгә юлыҡты: өс ҡатнашыусынан икәүһе генә сәхнәгә күтәрелә алды — өсөнсөһө, ҡыҙғанысҡа ҡаршы, ауырыу сәбәпле ҡатнаша алманы. Әммә был байрамдың әһәмиәтен кәметмәне. Жюри һәм тамашасыларҙың һөйөүе өсөн ике һөйкөмлө ҡыҙ көрәште: 1-се мәктәптең 8-се класс уҡыусыһы Самира Ғарипова һәм 2-се мәктәптең 7-се класс уҡыусыһы Алина Әхтәмова.

Ҡыҙҙар өсөн тәүге һынау — «Визит карточкаһы» конкурсы булды. Уларға үҙҙәре тураһында һөйләп кенә ҡалмаҫҡа, ә сығыштарын видеоролик менән нығытып, быны башҡорт телендә башҡарырға тура килде. Педагогтарҙан һәм Ҡоролтай вәкилдәренән торған жюри сығыштарҙың йөкмәткеһен, артистизмды һәм үҙенсәлеклелекте баһаланы. Самира ла, Алина ла  тамашасыларға үҙҙәренең тарихтарын еткерҙе, ҡала балаларының ата-бабалары телендә һөйләшергә ынтылыуын иҫбатланы.

Иң тулҡынландырғыс этап — «Тере һүҙ» конкурсы булды. Самира Ғарипова Абдулхаҡ Игебаевтың «Әсә йөрәге» шиғырын һайлаһа, Алина Әхтәмова Динә Талхинаның «Үҙ телемдә һөйләйем» әҫәрен уҡыны. Тамашасылар һәм жюри ағзалары билдәләүенсә, көндәлек тормошта ҡыҙҙар башлыса рус телендә аралаша. Әммә уларҙың тырышлығы, ҡатмарлы шиғри юлдарҙы өйрәнеү һәм матур итеп еткереү теләге ҙур ихтирам уятты. Һәр дөрөҫ әйтелгән һүҙ уларға еңел бирелмәне, әммә тап ошо ныҡышмалылыҡ кисәнең төп еңеүенә әйләнде.

Конкурстың динамик өлөшө — этнодефиле -  сәхнәне подиумға әйләндерҙе. Ҡыҙҙар стилләштерелгән милли кейемдәрҙе тәҡдим итте. Жюри күлдәктәрҙең һәм биҙәүестәрҙең матурлығын ғына түгел, ә конкурсанттарҙың үҙҙәрен тота белеүен, бөтөн образ булдырыу һәләтен дә баһаланы. Был этапта ике ҡатнашыусы ла үҙҙәрен һыуҙағы балыҡ кеүек тойҙо, сөнки Самира ла, Алина ла бейеү менән шөғөлләнә. Был мауығыу уларға киләһе музыкаль конкурста ла ярҙам итте, унда улар дәртле башҡорт бейеүҙәрен башҡарҙы.

Конкурс тәмле этап — милли ризыҡтар презентацияһы менән тамамланды. Самира Ғарипова өләсәһенең боронғо рецепты буйынса әҙерләнгән  ғөбәҙиәне алып килһә, Алина Әхтәмова традицияларҙан тайпылмаҫҡа булды һәм бөтәһен дә алһыу ҡоймаҡтар менән хайран ҡалдырҙы, уларҙы әҙерләү рецептын ентекләп һөйләп бирҙе.

Жюри бер еңеүсене  билдәләмәҫкә ҡарар итте, сөнки һәр ҡыҙ ысын батырлыҡ күрһәтте. Башҡорт телендә һөйләшеү, рус теле өҫтөнлөк иткән ҡала мөхитендә сығыш яһау —  ысын ҡыйыулыҡ. Шуға күрә ике ҡатнашыусы ла башҡорт Ҡоролтайынан һәм ғаилә хеҙмәтенән дипломдар һәм бүләктәр алды. Ҡыҙҙар «Иң һөйкөмлө ҡыҙ» һәм «Иң матур ҡыҙ» номинацияларында дипломдарға лайыҡ булды. Ойоштороусылар һәм жюри башҡорт теле уҡытыусылары Шакирә Ямаловаға һәм Зимфера Талиповаға ҙур рәхмәт белдерҙе.

«Һылыуҡай-2026» конкурсы тамамланды, әммә Самира һәм Алина өсөн ул киләсәккә мөһим аҙым, сәхнә тәжрибәһе һәм, бәлки, милли мәҙәниәт донъяһына ҙур юлдың башы булды.