Тәтешлелә СВО геройҙарына мемориал асылды

Тәтешле районы Түбәнге Балтас ауылында күптән түгел күнелдәрҙе айҡаған ваҡиға булды – махсус хәрби операция барышында һәләк булған герой яҡташтарыбыҙ иҫтәлегенә мемориаль плитәләр асылды.

Ташҡа уйып яҙылған был исемдәр рәт-рәт юлдар ғына түгел. Был – туғыҙ исем, туғыҙ яҙмыш, туғыҙ йылмайыу. Юрий Баймиев, Нәсим Галиев, Леонид Гыйльмияров, Финат Дәүләтбаев, Петр Дәүләтханов, Фирдүс Садриханов, Валентин Сундюков, Любомир Фазлыев һәм Илнур Хәйҙәршин — илебеҙ киләсәген яҡлап, ғүмерҙәрен биргән ир-егеттәребеҙ. Уларҙың исемдәре тыуған ауылы һәм районыбыҙ тарихында мәңгелеккә ҡаласаҡ, улар берҡайсан да онотолмаясаҡ.

Геройҙарыбыҙҙың Пермь крайы Чернушка һәм Лысьва райондарынан килгән яҡындары ҡатнашыуы һәркемдең күңелен нескәртте. Был – ҡайғы-хәсрәт һәм хәтер уртаҡ тигән һүҙ. Герой ҡайҙа ғына йәшәһә лә, ул мәңге сафта ҡала, ә уның батырлығы йөҙҙәрсә километрҙар аша кешеләрҙең йөрәктәрен берләштерә.