Николо-Березовкала яңы обелиск асылды

Краснокама районынан Бөйөк Ватан һуғышында 8168 кеше ҡатнаша, тик уларҙың 4188-е немец илбаҫарҙары менән батырҙарса алышып, яу яландарында ятып ҡала. Бөгөн төбәктең һәр ауыл биләмәһендә һуғыш ветерандары, тыл хеҙмәтсәндәре иҫтәлегенә һәйкәл-обелискылар, стелалар ҡуйылған.

Бөйөк Еңеүҙе ҡаршылар алдынан һәр ауылдағы обелиск тәртипкә китерелгән. Быйыл иһә бер нисә ауыл советында, шул иҫәптән район үҙәге Николо-Березовкала тыл хеҙмәтсәндәре һәм һуғыш осоро балаларына бағышланған яңы обелиск асылды.

Байрам хөрмәтенә Бөйөк Ватан һуғышы ветерандарына һәм тыл хеҙмәтсәндәренә юбилей миҙалдары, бүләктәр тапшырылды, уларҙың йәшәү шарттары тикшерелеп, мохтаждарға ярҙам күрһәтелгән.

Район үҙәгендә Бөйөк Ватан һуғышында һәләк булғандар иҫтәлегенә ҡуйылған һәйкәлгә сәскәләр һалдылар. Быйыл "Үлемһеҙ полк" йорттарға күсте, һәр өйҙә һуғыш осоро йырҙары яңғыраны. Район халҡы Бөйөк Еңеүҙең 75 йыллығын хөрмәтләп билдәләне.

Автор: Самат Ғәлин

Сығанаҡ https://bash.rbsmi.ru