16 августан уҡыусы балаларға 10 мең һум аҡса түләү башлана

Мәктәп йәшендәге балаларға 10 мең һум аҡса түләү 16 августан башлана, тип хәбәр итте ТАСС Рәсәйҙең Хеҙмәт министрлығы башлығы Антон Котяковтың белдереүенә һылтанма менән.

Уның һүҙҙәренсә, бер тапҡыр бирелә торған түләүгә ғаризалар 15 июлдән ҡабул ителә. Аҡса алыусылар иҫәбендә – алты йәштән 18 йәшкә тиклемге балалар, шулай уҡ 18 йәше тулған, мәктәптә уҡыуын дауам иткән һаулыҡ мөмкинлектәре сикле уҡыусылар.

Аҡса алты йәшлек бөтә балаларға ла түләнә, шул иҫәптән быйыл ниндәйҙер сәбәптәр буйынса мәктәпкә бармаусыларға ла.

«Аҡсаны август уртаһында, йәғни уҡыу йылы башланырға ике аҙна ҡалғас — 16 августан түләргә йыйынабыҙ, — тип хәбәр итте Хеҙмәт министрлығы башлығы Рәсәй президенты Владимир Путиндың хөкүмәт ағзалары менән кәңәшмәһендә. — Яңы уҡыу йылы алдынан 20 миллиондан ашыу балаға ошондай ярҙам күрһәтеү планлаштырыла, федераль бюджет сығымдарының дөйөм күләме 204 миллиард һумға төшә».